תהילים 72

התחל את הפרק הזה עם AI

הישאר בטקסט ושאל על התנועה, המתח, הרקע ומה שהפרק הזה מגלה בתוך הספר הגדול יותר.

1 לשלמה אלהים משפטיך למלך תן וצדקתך לבן מלך׃ 2 ידין עמך בצדק וענייך במשפט׃ 3 ישאו הרים שלום לעם וגבעות בצדקה׃ 4 ישפט עניי עם יושיע לבני אביון וידכא עושק׃ 5 ייראוך עם שמש ולפני ירח דור דורים׃ 6 ירד כמטר על גז כרביבים זרזיף ארץ׃ 7 יפרח בימיו צדיק ורב שלום עד בלי ירח׃ 8 וירד מים עד ים ומנהר עד אפסי ארץ׃ 9 לפניו יכרעו ציים ואיביו עפר ילחכו׃ 10 מלכי תרשיש ואיים מנחה ישיבו מלכי שבא וסבא אשכר יקריבו׃ 11 וישתחוו לו כל מלכים כל גוים יעבדוהו׃ 12 כי יציל אביון משוע ועני ואין עזר לו׃ 13 יחס על דל ואביון ונפשות אביונים יושיע׃ 14 מתוך ומחמס יגאל נפשם וייקר דמם בעיניו׃ 15 ויחי ויתן לו מזהב שבא ויתפלל בעדו תמיד כל היום יברכנהו׃ 16 יהי פסת בר בארץ בראש הרים ירעש כלבנון פריו ויציצו מעיר כעשב הארץ׃ 17 יהי שמו לעולם לפני שמש ינין שמו ויתברכו בו כל גוים יאשרוהו׃ 18 ברוך יהוה אלהים אלהי ישראל עשה נפלאות לבדו׃ 19 וברוך שם כבודו לעולם וימלא כבודו את כל הארץ אמן ואמן׃ 20 כלו תפלות דוד בן ישי׃